بسمه تعلى
من الكاظميه المقدسه ابعث اليكم ايه الاخوه العاملين في
هذا الموقع الغالي والعزيز على قلوبناسلام ولائي معطر بروض
الامامين موسى بن جعفر ومحمد الجواد عليهم السلام فتقبلوا
منا رحمكم الله بشفاعة الزهراء عليها السلام
============الموضوع ابوذيات شهادة الزهراء عليها السلام
====================================
البيت الاول
------------
عله الزهره الفرح مايوم بسمار
هضيمه والهضم جرعته بسمار
الاشد تنصاب وسط الضلع بسمار
او وكع محسن تشوفه اعله الوطيه
===============================
الثاني
----------
عليه الحزن يتوجب يشيعه
وكسر ضلعي اعله كل واحد يشيع
النعش وصيت بالضلمه يشيعه
وكبري ايضيع ردته اعله البريه
============================
اريد ابجي عليش امن ابجي يابه
ضالم والحقد للباب يابه
صحت لمن عصرني ابصوت يابه
انكسر ضلعي يسلطان البريه
=========================
انه زينب ودمعي ادموم ينصاب
عليمن ضلع امي اباب ينصاب
شبده منها ذنب ضلام ينصاب
مهي اوديعة محمد عالبريه
============================
نوايب عله اشبول الزهره ضلعين
وابو فاضل لخوه حسين ضلعين
بني اميه اكسروا للنبي ضلعين
ضلع سبطه وضلع بنته الزجيه
==========================
مرة اخرى تحيات ودعاء خالص من تحت
قبة الامامين الهمامين موسى بن جعفر ومحمد الجوادعليهم
السلام الاكل الذين ابدعوا في اخراج هذا الموقع الجليل
وتقبلو قبلات ولائيه معطره من روض الحسين والعباس عليهم
السلام يبعثها لكم خادم خدام الحسين الشاعر الحسيني سيد
عدنان الحمامي
وبمناسبة شهادة الصديقه الطاهره اهدي هذه القصيده الا خدام
الزهراء كافة
====================
المستهل وزن التجليبه
------- ----------
صدك يم الحسن هليتي دمع العين
من عندج ضلع مكسور لو ضلعين
===============
صدك تبجين ونتي المابجت عينج
ومن كثر الحزن الله الذي ايعينج
كالوا ينسمع يافاطمه اونينج
وليل انهار من كثر الهضم تبجين
==================
لاتبجين دمعج غالي لتهليه
وكلبج بالحزن يالزهره لتسليه
مو لجلج سماءه الخالق امعليه
وباري الكون يغضب لمن اتغضبين
===================
اشلون اتجاسرت جف القذر عالباب
ومن صدرج ضلع يم الحسن ينصاب
هوه لوجرح يافاطمه جا طاب
اجروح اهواي منهن ياجرح تشكين
==================
تشكين المصايب عكب سيد الكون
يالزهره ومندري يامصيبه اتهون
فكد المصطفى والحكج ايغصبون
لو محد فزعلج لمن اتنادين
================
ناديتي علي عنج علي وينه
وشجان العذر ما بينج وبينه
مو ضلع المهشم شافته عينه
ويسمع جان من الامج اتونين
===============
ونيتي وكبل ماتغمض اعيونج
ابضلمة ليل وصيتي يدفنونج
كبل الموت انتي منخطف لونج
المن زينب اتعيفيها والحسنين
============ت
مت بحمد الله
سلام وتحيات الا كل العاملين في هذا
الموقع الولائي والذي يحمل اسم مولاتنا وشفيعتنا فاطمة
الزهراء ع روحي وارواح العالمين لها الفداءواتمنى لهم
التوفيق في خدمة محمد ص
وال محمد وان يحشرهم مع محمد وال محمد
====================================
قصيده حواريه بين زينب واخيها العباس عليهم السلام كانه في
ليلة العاشر من محرم زينب ع تنضر الاالجيوش والكتائب
والرايات تزحف لقتال الحسين ع فكانت هذه الصوره التي
صورتها بمقطوعه شعريه عسى ان تنال رضاكم
======================
خويه شودليلي احتار شعدها الخيل ملتمه
وروحي حست اباخطار جنها الكوم مهتمه
حيل الكلب ماضل بيه اشوف العيله مغتمه
ليله يم ولدها اتلوب سترك ربي وتشمه
ورمله حضنته الجسام اسمعتها اتكلفه ابعمه
اتكله اوليدي هذا اليوم ذخر ردتك لبو اليمه
جنها اوصية اموادع ودلالي كثر همه
يسبع الكنطره شرايك والدنيه غدة ضلمه
من كثرة كتايبها وهذا الجيش شيكحمه
بيهم ميت الف واكثر يخويه ومن يرد هالخيل
=====================
جواب العباس ع للعقيله بعد ما ابتسم في وجهها
=============================
يختي الميت الف شنهو عندي وانه ابن حيدر
شما زادوا بعد ولله وكتايبهم تجر تكثر
اخوج وماتهمني الخيل تشوفيني علي لوكر
لخلي الرايه والصارم من دم العدو ايكطر
واصير اعليهم الطاعون يختي وصدي للمنضر
وحك جدج وابوج احلف وحك الضلع اللتكسر
ابوجودي موش يوصلج عدو لو راد بس ينضر
اصب ماي العمه ابعينه ويضل طول الدهر يذكر